<

زمزیران
دانشنامه تاریخ ،جغرافیا، فرهنگ و ادبیات و فولکلور و جاذبه های گردشگری شهرهای(سردشت و پیرانشهر) 
قالب وبلاگ
نويسندگان
لینک دوستان

نه‌ورۆز و نیشانه‌ناسی ئاور - قه‌ره‌نی ئه‌حمه‌د ئاغایی-پیرانشار


نه‌ورۆز و نیشانه‌ناسی ئاور

قه‌ره‌نی ئه‌حمه‌د ئاغایی-پیرانشار


فه‌لسه‌فه‌ی زاتی کۆمه‌ڵگا ئه‌وه‌ی سه‌لماندووه‌ که ئێمه له‌ جیهانی زمان‌دا ده‌ژین که‌ ئه‌وه‌ش خاڵی سه‌ره‌کیی جیاوازیی نێوان مرۆرڤ و بوونه‌وه‌ره‌کانی تره‌، مرۆڤه‌کان به‌ پێچه‌وانه‌ی هه‌موو گیان‌له‌به‌رانی تر له‌ رێگه‌ی زمانه‌وه‌ بیر ده‌که‌نه‌وه‌ و له‌ ته‌ک دیارده‌کان و له‌ ته‌ک یه‌کتر دا په‌یوه‌ندی سازده‌که‌ن. جا ئه‌و زمانه‌ چ زمانی نووسین بێ چ زمانی ئاخافتن یان داب نه‌ریت و بۆنه‌ کۆمه‌ڵایه‌تییه‌کان و ... هتد.

نه‌ورۆز و چوارشه‌ممه‌سووری له‌ په‌نا شایی، شین، شێوه‌ی جل وبه‌رگ له‌به‌رکردن و شێوه‌ی نان خواردن و ... که‌ هه‌ر یه‌که‌و زمانێکی تایبه‌ت به‌ خۆیان هه‌یه‌، به‌شێکن له‌ زمانی بۆنه‌ کۆمه‌ڵایه‌تییه‌کان که‌ کۆمه‌ڵێک نیشانه‌یان گرتۆته‌ خۆ. ئاور یه‌کێک له‌و ‌ نیشانانه‌یه که له رێگه‌ی ئوستووره‌یه‌که‌وه‌ به‌رهه‌م هاتووه‌ یا لانی‌که‌م ده‌لاله‌ته‌کانی له ژێر کارتێکردنی ئوستووره‌یه‌که‌وه ‌ـ که‌ دواتر باسی  ده‌که‌ین ـ ره‌نگ و بۆیه‌کی تایبه‌تیان به‌خۆوه‌ گرتووه‌. هه‌ڵبه‌ت ئاور به‌ر له‌وه‌ی که‌ ئوستووره‌ بۆ سه‌پاندنی ویست و به‌رژه‌وه‌ندییه‌کانی خۆی بیکا به ره‌مز و نیشانه‌ ، له زاتی خۆی دا کۆمه‌ڵێک تایبه‌تمه‌ندی ره‌مزی و نمادینی هه‌یه، ئه‌و تایبه‌تمه‌ندییانه‌ش تایبه‌تمه‌ندی هه‌ر چوار ماکه‌ی سه‌ره‌کی:"ئاو، ئاور ، خاک و با" یه‌ که‌ هاوکات دوو دژ ده‌گرنه‌ خۆیان. بۆ نموونه‌ ئاور له‌ په‌نا ئه‌وه‌ی دا ده‌توانێ هه‌موو شتێک بسووتێنێ و بیکا به‌ خه‌ڵووز، سه‌رچاوه‌ی وزه‌ و هه‌وێنی به‌رهه‌م هێنانی ئامراز گه‌لێکی له‌ چه‌شنی ئاسنه‌ که‌ بنه‌ماکانی پێشکه‌وتنی مرۆڤیان له‌سه‌ر دامه‌زراوه‌.

کوتمان که‌ ئاور جگه‌ له‌وه‌ی که‌ له‌ زاتی خۆی دا کۆمه‌ڵێک تایبه‌تمه‌ندی ره‌مزی و نمادینی هه‌یه‌، ئوستووره‌ش ده‌یکا به‌ نیشانه‌ و ره‌مز. بۆ تێبینی ده‌بێ ئه‌وه‌ش بگوترێ که‌ هه‌ر چه‌ند له‌م نووسراوه‌یه‌دا ئوستووره‌ وه‌ک دیرۆکی قاره‌مان و خواکان به‌پێی پێویست ئاوڕی لێده‌‌درێته‌وه‌، به‌ڵام مه‌به‌ستی ئێمه‌ له‌ ئوستووره‌ له‌سه‌ر پێناسه‌یه‌ک دامه‌زاوه‌ که‌ "بارت" له‌ ئوستووره‌ کردوویه‌تی. "بارت" ده‌ڵێ: ئوستووره‌، ئایدیۆلۆژیای زاڵی سه‌رده‌میانه‌یه‌ که‌ زۆرجار له‌ رێگه‌ی ده‌سه‌ڵاتداران به‌ مه‌به‌ستی مانه‌وه‌ و به‌رده‌وام بوونیان ساز ده‌کرێن، ئێستا ره‌نگه‌ پرسیارێکیش هه‌ر ئه‌وه‌ بێ که‌ ئوستووره‌ به‌ چ شێوه‌یه‌ک و چۆن به‌رهه‌م دێ؟ بۆ وڵامدانه‌وه‌ی ئه‌و پرسیاره‌ جارێکی تر ده‌گه‌ڕێینه‌وه‌ لای زمان که‌ ئوستووره‌‌کان له‌ رێگه‌ی ئه‌وه‌وه‌ نیشانه‌کان و ره‌مزه‌کان به‌ مه‌به‌ستی پشتیوانی و زیندوو راگرتنی خۆیان ده‌ئافرێنن،که‌واته‌ پرۆسه‌ی ئافراندنی ئوستووره‌ له‌ نێو زمان‌دا روو ده‌دا یا به‌ وته‌یه‌کی تر، نیشانه‌کان به‌شێکن له‌ زمان، ئوستووره‌ ده‌خزێته‌ نێو زمان و نیشانه‌کان له‌ دوولایه‌نی ده‌لاله‌ت(راسته‌وخۆ و شاراوه‌) نێو ئاخن ده‌کا، ئه‌وسا له‌ رێگه‌ی تێکه‌ڵ کردنی دوو لایه‌نی راسته‌وخۆ یا رووبه‌ڕوو و شاراوه‌، نیشانه‌یه‌ک ده‌خوڵقێنێ که‌ ئوستووره‌ جێگیر ده‌کا و به‌رده‌وام به‌رهه‌می دێنێته‌وه‌. له لایه‌کی دیکه‌وه هۆی دیسان به‌رهه‌م هاتنه‌وه‌ی ئوستوره له لایه‌ن کۆمه‌ڵگاوه له دوو‌‌‌ لایه‌نی ده‌لاله‌تی نیشانه‌کان گرێ دراوه‌ که‌ کۆمه‌ڵگا ده‌لاله‌تی راسته‌وخۆیه‌ که‌ وشیارانه‌ و ده‌لاله‌ته‌ شاراوه‌که‌ ناوشیارانه‌ وه‌رده‌گرێ تا ئوستووره‌ به‌ ته‌واوه‌تی ده‌روونی بکرێ. ده‌روونی کردنی ئوستووه‌ له‌ لایه‌ن کۆمه‌ڵگاوه‌ واته‌ ژیان و زیندوومانی ئوستووره‌ که‌ پرۆسه‌یه‌کی ورد و سه‌رنج راکێشه‌ و له‌ درێژه‌ی ئه‌م وتاره‌دا ده‌گه‌ڕێینه‌وه‌ سه‌ری و باسی لێ‌ده‌که‌ین. ئێستا ئه‌گه‌ر هه‌ر به‌پێی ئه‌وه‌ی که‌ تا ئێره‌ باسی لێکرا، واته‌ له‌ نێو نیزامی زمانی نه‌ورۆز و چوارشه‌ممه ‌سوورییه‌وه‌ بڕوانینه‌ ئاور ده‌بینین نیشانه‌یه‌‌ک که‌ له‌ رێگه‌ی ئوستووره‌ی کاوه‌ی ئاسنگه‌ر له‌ دوو لایه‌نی ده‌لاله‌تی نێو ئاخن ده‌کرێ. که‌ ئه‌و دوو ده‌لاله‌ته‌ش له‌ رێگه‌ی ئوستووره‌ و لێره‌وه‌ له‌ رێگه‌ی ئوستووره‌ی کاوه‌وه به‌رهه‌م دێن و هه‌ر له‌و رێگه‌یه‌شه‌وه تێکه‌ڵ به یه‌کتر ده‌کرێن.کاوه‌ ته‌خت و تاجی زوحاک تێک‌ده‌ڕِمێنێ، ده‌سه‌ڵات له‌ زوحاک ده‌ستێنێته‌وه‌ و ده‌یداته‌ فه‌ره‌یدوون که‌ به‌ هه‌ڵکردنی ئاور و جێژن گرتن له‌ ده‌روی ، ئاور ده‌بێ به‌ ره‌مزێک که‌ ئه‌و رووداوه‌ به‌ ته‌واوی له‌ نێو خۆی دا جێ ده‌کاته‌وه‌، ئاور ده‌بێ به‌ نیشانه‌یه‌ک که‌ ده‌لاله‌ته‌ راسته‌و خۆیه‌که‌ی تێک شکانی زوڵم وزۆریی ده‌سه‌ڵاتداران و حکوومه‌ت کردنی خه‌ڵک به‌سه‌ر خه‌ڵک دایه‌ و ده‌لاله‌ته‌ شاراوه‌که‌شی ئه‌وه‌یه‌ که‌ حکوومه‌تی پاشایه‌تی حکوومه‌تی خه‌ڵکه‌ و ئاڵای شاهه‌نشاهی ئاڵای هه‌مووانه‌. بۆ تێبینی پێویسته‌ ئاماژه‌ به‌وه‌ بکرێ که‌ ئه‌م رووداوه‌ چ رووداوێکی مێژوویی بێ و چ ئه‌فسانه ‌یان حه‌قایه‌تێک بۆ ده‌ربڕِین و مانابه‌خشی به‌ نه‌ورۆزـ  که‌ ساغ کردنه‌وه‌ی هیچ کامیان مه‌به‌ستی ئه‌م وتاره‌ نیه‌ـ ئوستووره‌یه ‌که‌ ئاور ده‌کا به‌ نیشانه‌یه‌ک که‌ ده‌لاله‌ته‌ شاراوه‌که‌ی رێزگرتن له‌ ده‌سه‌ڵاته‌،جا بگره‌ ئه‌و ده‌سه‌ڵاته‌ با ده‌سه‌ڵاتێکی چه‌وسێنه‌ریش بێ. ئه‌مه‌ هه‌ر چه‌نده‌ خه‌سارێکی گه‌وره‌یه‌ که‌ ئوستووره‌ به‌سه‌ر کۆمه‌ڵگای داده‌سه‌پێنێ و کۆمه‌ڵگایه‌کی خه‌سیو به‌رهه‌م دێنێ به‌ڵام خه‌ساری له‌و گه‌وره‌تر ئه‌وه‌یه‌ که‌ کۆمه‌ڵگا هه‌موو ساڵێ و له‌ هه‌موو سه‌ر ده‌مێک دا له‌ رێگه‌ی زمانی نه‌ورۆز و چوارشه‌ممه ‌سورییه‌وه‌ جارێکی تر ئه‌و ئوستووره‌یه‌ به‌رهه‌م دێنێته‌وه‌.

ئه‌و شێوه‌ روانینه‌ له‌ ئاور، له‌ نیشانه‌ ناسی مێژوویی ئاورمان نێزیک ده‌کاته‌وه‌ و سه‌رنجمان بۆ ئه‌م لایه‌نه‌ راده‌کێشێ که‌ چۆن ئوستووره‌کان له‌ لایه‌ن دسه‌ڵاتدارانه‌وه‌ ساز ده‌کرێن و تا تێکڕِمانی نیزامی زمانی تایبه‌ت به‌ خۆیان واته‌ ئه‌و نیزامه‌ی نیشانه‌کانی تێدا به‌رهه‌م دێن، زیندوو ده‌مێنن، هه‌رچه‌ند ئێمه‌ ناتوانین نکۆڵی له‌وه‌ بکه‌ین، به‌ڵام ناتوانین حاشا له‌وه‌ش بکه‌ین که‌ زۆر جار بێ گۆڕِینی نیزامی زمانیی ده‌کرێ جێگوڕکێ به نیشانه‌کان بکه‌ین یا ده‌لاله‌ته‌کانی نیشانه بگوڕین. ئه‌وه‌ی ئاشکرا بێ ئه‌وه‌یه: که نه‌ورۆز هه‌ر به‌ قووه‌تی خۆی بوونی هه‌یه‌ و جێگۆڕِکێ و گۆڕینی نیشانه‌ی ئاور به‌ نیشانه‌یه‌کی‌تری وه‌ک سفره‌ی حه‌وت سین له‌ کۆمه‌ڵگای کورده‌واری دا نه‌کراوه‌ و حه‌ول و ته‌قه‌للای به‌ڕێوه‌به‌رانی نه‌ورۆز نه‌یتوانیوه ئاور وه‌ک نیشانه‌یه‌کی به‌توانا له‌ نێو ئه‌و زمانه‌ بسڕِنه‌وه‌. سه‌ره‌ڕِای ئه‌وه‌ش هێندێک رووداوی جۆراوجۆر له‌ چاخی هاوچه‌رخ دا تا رِاده‌یه‌ک گۆڕِانکارییان به‌سه‌ر ده‌لاله‌ته‌کانی ئاوردا هێناوه‌ که‌ ئه‌وه‌ش به‌ ئوستووره‌یه‌که‌وه‌ به‌ستر‌اوه‌ته‌وه‌ که‌ خه‌ریکه‌ له‌ لایه‌ن کۆمه‌ڵگاوه‌ ئاراسته‌ ده‌کرێ.

هه‌ڵکردنی ئاور له‌ رۆژانێک جگه‌ له‌ رۆژی نه‌ورۆز و به‌تایبه‌ت له‌ لایه‌ن کۆمه‌ڵگای کورده‌واری و له‌ چوارچێوه‌ی ئێران دا کۆمه‌ڵێک ره‌مز و لایه‌نی مانایی تازه‌ی خستۆته‌ سه‌ر شانی ئاور، سه‌ره‌کی ترین ره‌مز، هه‌ڵکردنی ئاور به‌ دزیه‌وه‌ و له‌سه‌ر کێوه‌ به‌رزه‌کانه‌ که‌ ده‌کرێ وه‌ک کرده‌وه‌ویه‌کی پڕۆمته‌یی چاوی لێ بکرێ. کرده‌وه‌ی پڕۆمته‌ وه‌ک راگوێستنی ئاور له‌ ده‌ست زێئووس خوای خواکانه‌وه‌ بۆ مرۆڤ، کرده‌وه‌یه‌که‌ که‌ به‌ شێوه‌یه‌کی ره‌مزی باس له‌ راگوێستنی ده‌سه‌ڵات ده‌کا، ئه‌و که‌سه‌ی که‌ له‌  شێوه‌ی پڕۆمته‌ و به‌ دزییه‌وه‌ ده‌چێ ئاور ده‌کاته‌وه‌، خه‌ریکه‌ ئاور ده‌کاته‌ نیشانه‌یه‌ک که‌ ده‌لاله‌ته‌ شاراوه‌که‌ی راگوێستنی ده‌سه‌ڵاته‌.

تا ئێره‌ی باسه‌که ، ئێمه دوو ئوستووره‌مان له به‌رامبه‌ری یه‌کتر دانان؛ ئوستووره‌ی کاوه و ئوستووره‌ی پڕۆمته. هه‌روه‌ها باس له‌وه‌ش کرا که ئایدیولوژیای زالی سه‌رده‌می کورده‌واری خه‌ریکه له‌ ئوستوره‌ی پڕۆمته دا خۆ وه‌ده‌ر ده‌خات و به‌رهه‌م دێنێته‌وه‌ ، لێره‌دا بۆ هه‌رچی زیاتر روون بوونه‌وه‌ی باسه‌که‌ له‌ نیشانه‌ناسی تایبه‌ت به‌ باشلار که‌ڵک وه‌رده‌گرین ئه‌ویش ته‌نیا بۆ ئه‌و مه‌به‌سته‌ که‌ بتوانین چه‌ند پرسیارێک زه‌ق که‌ینه‌وه‌.

گاستۆن باشلار له‌ کتێبی ده‌رونشیکاری ئاوردا گرێیه‌ک به‌ نێوی گرێی پڕۆمته‌ نێو ده‌بات، ئه‌و باس له‌ منداڵێک ده‌کات که‌ چه‌خماخ یا شقارته‌یه‌ک ده‌دزێ تا بچێت له‌ په‌نا و په‌سیوێک و به‌دزی ئاور دابگیرسێنێ، ئه‌و دیارده‌یه‌ بۆ ئه‌و که‌سانه‌ی که‌ له‌ گونده‌کانی کوردستان ژیابن دیارده‌یه‌کی ئاشنایه‌ و بێگومان دیتویانه‌ که‌ چۆن گیشه‌ و کادێنه‌کان ده‌بن به‌ خه‌ڵووز.

باشلار ئه‌و کرده‌وه‌یه‌ی منداڵ به‌ ده‌ربڕینیێکی نمادین و ره‌مزی ده‌ژمێرێ، واته‌ منداڵ له‌رێگه‌ی هه‌ڵکردنی ئاور ده‌یهه‌وێ ئه‌وه‌ به‌ باوکی (که‌ هێمای ده‌سه‌ڵاته) بسه‌لمێنێ که‌ منیش به‌ ئه‌قڵانیه‌ت گه‌یشتووم و پێویستیم به‌سه‌ربه‌خۆیی هه‌یه‌ و ده‌توانم سه‌ربه‌خۆ بم، ئه‌رێ ئه‌وه ویستی ئه‌و که‌سانه‌ش نییه‌ که‌ له‌ لووتکه‌کان ئاور داده‌گیرسێنن؟ئه‌رێ سازکردنه‌وه‌ی ئوستووره‌یه‌ک له‌سه‌ر ره‌چه‌ڵه‌کی پڕۆمته ئاوری نه‌کردووه‌ به‌ نیشانه‌یه‌ک که‌ ده‌لاله‌ته‌ شاراوه‌که‌ی راگوێستنی ده‌سه‌ڵات بێت؟

ئه‌رێ ئه‌م شێوه‌ مامڵه‌کردنه له‌ ته‌ک ئاور لانی که‌م ناتوانێ به‌رگری له‌ به‌رهه‌م هاتنه‌وه‌ی ئایدیۆلۆژیایه‌کی‌ داگیر بکات؟

ره‌نگه‌ ئێستا خوێنه‌ریش له‌ ته‌ک ئێمه‌ هاوده‌نگ بێت که‌ زمان چه‌قی به‌رهه‌م هاتنه‌وه‌ی گوتاری ئوستووره‌یه‌کی له‌ چه‌شنی کاوه‌یه‌، به‌و مانایه‌ که‌ گۆڕینی نیشانه‌ له‌ لایه‌ک و تێک ڕماندنی نیزامی زمانی له‌ لایه‌کی دیکه‌وه‌ له‌ پێ خستنی ئوستووره‌ و بونیات نانه‌وه‌ی سیستمێکی فکری تازه‌یه‌ که‌ ئه‌وه‌ش له‌ خۆی دا بنه‌مایه‌که‌ بۆ به‌رهه‌م هاتن و سه‌قامگیر بوونی نیزامێکی زمانی تازه‌، واته‌ ئاڵوێر (تعامل)ی به‌رده‌وام له‌ نێوان فکر و زمان  ده‌رفه‌تێکه‌ بۆ مرۆڤ تا رێسا چه‌وسێنه‌ره‌کانی ئایدیۆلۆژیا وێران بکا، که‌ هه‌ڵگرتنی هه‌نگاوی له‌م چه‌شنه‌ پێویستی به‌وه‌ هه‌یه‌ که‌ له‌ ده‌روونی کردنی ئوستووره‌ به‌ هه‌موو نیشانه‌کانی به‌رگری بکه‌ین که‌ ئه‌وه‌ش بێ لێکدانه‌وه‌ی پڕۆسه‌ی ده‌روونی کردنی ئوستووره‌ کارێکی دژواره‌.

فرۆید پێکهاته‌یه‌کی فه‌ڕزی بۆ زه‌ین داده‌ڕێژێ که‌ له‌ سێ به‌شی سه‌ره‌کی پێکهاتووه‌، ئید(id) یا سه‌رچاوه ‌و کانگای غه‌ریزه‌، ئیگۆ(ego) یا خود، سوپێرئیگۆ یا ئه‌و په‌ڕی خود، ئید هه‌ر وه‌ک وترا کانگای ویسته‌ غه‌ریزییه‌کانه‌،سوپێرئیگۆش له‌ بایخه‌‌ کۆمه‌ڵایه‌تییه‌کان و به‌ گشتی له‌ ئایدیۆلۆژیا که‌ هه‌ڵگری کۆمه‌ڵیک بابه‌تی وه‌ک ده‌بێ ئه‌وه‌ی بکه‌ی و ئه‌وه‌ی نه‌که‌ی پێک هاتووه‌ ، له‌و نێوه‌ دا خود رۆڵێکی گرینگی هه‌یه‌ که‌  ده‌بێ به‌ له‌ به‌ر چاوگرتنی راستییه‌کان له‌ نێوان ویسته‌کانی غه‌ریزه‌ و ویسته‌کانی ئایدۆلۆژی یا سوپێرئیگۆ هاوسه‌نگی پێک بێنێت ، جگه‌ له‌وه‌ش له‌ پێکهاته‌ی فڕۆید دا هاتووه‌ که‌ سێ به‌شه‌ له‌ سێ قۆناغی نه‌ست یا ناوشیار و نیوه‌وشیار و وشیار یا هه‌ست دا کاره‌کانی خۆیان به‌ڕێوه‌ ده‌به‌ن.

                                                       ویژدان
 

                                    ئیگۆ         ego   هه‌ست یا وشیاری
 

                                    ئید         id         نیوه‌ وشیاری
 

                                                     نه‌ست یا ناوشیاری
 

                                                        ویژدان


په‌یوه‌ندی پاژه‌ جیاوازه‌کانی که‌سایه‌تی له‌ گه‌ڵ قۆناغه‌کانی وشیاری ( اقتباس از لیبرت و اشپیگلێر 1970)

به‌ چاو خشاندنێکی خێرا به‌سه‌ر ئه‌م (شکڵ)ه‌ دا ئه‌وه‌مان بۆ ده‌رده‌که‌وێ که‌ ئید ( که‌ سه‌رجه‌م ویسته‌ غه‌ریزییه‌کان ده‌گرێته خوی‌‌) نه‌ست به‌ ته‌واوی باڵی به‌سه‌ر دا کێشاوه‌ و له‌ ناوشیاری دا ده‌که‌وێته‌ کار، به‌شێک له‌ ئیگۆ له‌ ناوشیاری و به‌شی هه‌ره‌ زۆری له‌ نیوه‌ وشیاری و ئه‌وه‌ی تریش له‌ وشیاری دایه‌؛واته‌ ئێمه ‌تا راده‌یه‌ک به‌ سه‌ر که‌سایه‌تی خۆمان دا ئاگاییمان هه‌یه‌ به‌ڵام سوپێڕئیگۆ که‌ باسی سه‌ره‌کی ئێمه‌یه‌ و ئه‌و شوێنه‌یه‌ که‌ ئوستووره‌ کاری تێدا ده‌کا و چه‌قی جۆشخواردنی ئوستووره‌ له‌ گه‌ڵ تاک تاکی که‌سایه‌تیه‌کانی کۆمه‌ڵگایه‌ به‌ هه‌ر سێ شێوه‌ی وشیار و نیوه‌ وشیار وناوشیار ده‌که‌وێته‌ کار. ئه‌و به‌شه‌ له‌ سوپێڕ ئیگۆ که‌ له‌ وشیاری دا کار ده‌کات له‌ ئیراده‌ی که‌سایه‌تییه‌کان دایه‌ و ئه‌و به‌شه‌ش که‌ له‌ نا وشیار دا کار ده‌کات شتێک له‌ ده‌روونی که‌سایه‌تییه‌کانی دا به‌رهه‌م ده‌هێنێت که‌ نێوی ویژدانی له‌ سه‌ر دانراوه‌ ، ئیستا ئه‌گه‌ر بگه‌ڕێینه‌وه‌ سه‌ر باسه‌که‌ی پێشوو؛کوتمان ئوستووره‌ دوو لایه‌نی راسته‌وخۆ و شاراوه‌ تێکه‌ڵ به‌ یه‌کتر ده‌کات ، لایه‌نی راسته‌وخۆ به‌ سیمایه‌کی رازاوه‌وه‌ که‌ هه‌یه‌تی و زۆر جار له‌ ویسته‌کانی ئید لایه‌نگری ده‌کات له‌ لایه‌ن ئیگۆوه‌ وه‌رده‌گیرێن و لایه‌نه‌ شاراوه‌که‌ به‌ شێوه‌یه‌کی ناوشیار په‌ل داده‌کوتێ، پاش وه‌ر‌گیرانی ئوستووره‌ و ئاشتی له‌ نێو ئه‌م سێ پاژه‌دا ئوستووره‌ به‌ ته‌واوی جێگه‌ی خۆی خۆش ده‌کات، ئه‌وسا‌ له ئه‌سڵی چێژ په‌یڕه‌وی ده‌کات، ئه‌گه‌ر ناڕازیش بێت هه‌ر سه‌ر کوت ده‌کرێ ، ئوستووره‌ له‌ نێو که‌سایه‌تی دا ده‌توێته‌وه‌ و ده‌بێت به‌ به‌شێک له‌ ویژدانی مرۆڤ و به‌ گشتی کۆمه‌ڵگا ، ئه‌وسا کۆمه‌ڵگا به‌ گژ هه‌ر بیر و بۆچونێک دا ده‌چێته‌وه‌ که‌ بیهه‌وێ ئایدۆلوژی وێران بکات، که‌ ئه‌وه‌ش ده‌رفه‌تێکه‌ بۆ زمان تا به‌رده‌وام گوتاری داگیر که‌رانه‌ی خۆی به‌رهه‌م بهێنێته‌وه‌.

[ پنجشنبه ٥ دی ۱۳٩٢ ] [ ۱۱:٢۱ ‎ب.ظ ] [ محمد فاضل شوکتی ]
.: Weblog Themes By Iran Skin :.

درباره وبلاگ

گر می خواهی پس از مرگ فراموش نشوی یا چیزی بنویس که قابل خواندن باشد یا کاری کن که قابل نوشتن باشد. "بنیامین فرانکلین" (زمزیران نام رشته کوهی زیبا و بلند در سلسله کوههای زاگرس مابین مهاباد ، ،سردشت و پیرانشهر میباشد) محمد فاضل شوکتی دانش آموخته علم مدیریت .کارمند و مدرس: که به تحقیق در زمینه میراث معنوی و فکری شهرهای پیرانشهر و سردشت می پردازد،و سعی دارد تا برگیرنده مطالب و مقالات مرتبط با این دو شهر باشد. این وبلا گ در راستای مدیریت و جمع آوری اسناد ،مدارک ،عکسها و نشریات،مشاهیر و اطلاعات : تاریخی ،فرهنگی،اجتماعی، دوشهر( پیرانشهر و سردشت ) به منظور شکل دادن کانالی برای حضور در فضای مجازی و به اشتراک گذاشتن این اطلاعات و معرفی این دو شهربه ایران و جهان شکل گرفته است . بررسی و غور در میراث معنوی و فکری هزاران ساله ی این دو شهر از عهده یک یا چند نفر خارج بوده ،و یاری اصحاب قلم و نظر را می طلبد،، اگر این وبلاگ بتواند نقطه عطفی باشد برای زاده شدن اندیشه ای نو در پایان نامه های دانشگاهی و یا روان نمودن اطلاع رسانی به گردشگران و ایجاد پل ارتباطی مابین مردمان خون گرم این دوشهر با جهان و جذب گردشگران به مراکز طبیعی جذاب وتجاری این منطقه ، به هدف خود رسیده است . همچنین این وبلاگ حاوی عکسهای بسیارزیبا و دلپذیر و پر ارزش، قدیمی و نادری است که یاد آورخاطرات و حوادث و لحظات تاریخی تلخ و شیرین گذشته و پیوند آنها با حال و آینده شماخواهد بود . مطمئنا لحظاتی را که با ما سپری خواهید نمود شیرین خواهد بود. این وبلاگ را می‌توان یک مرجع برای معرفی مراکز گردشگری و تفریحی و توریستی وتجاری شهرهای پیرانشهر و سردشت دانست. امید می رود بازدید کنندگان عزیز ، کاستی های آن را به طرق ممکن گوشزد و با ارسال تجربیات موفق خود دراین حوزه و نیز در راستای پر بارتر نمودن محتویات زمزیران، مارا یاری فرمایند.
موضوعات وب
RSS Feed